Ұзындығы үш, ал ені бір жарым метр болатын Wuling Mini EV — әлем бойынша ең көп сатылатын электромобиль. Аспан асты елінде былтыр 925 келі тартатын хетчбэктің 470 мың данасы өткен. Танымал болуының негізгі себебі бағасында, ең арзаны 4700 доллар тұрады.
Қытайлар енді Wuling Mini EV Convertible деп аталатын ашық түрленімін жасады, ол дүниежүзіндегі ең кішкентай кабриолет атануы мүмкін, өйткені көлемі шамалас Smart Fortwo Cabrio шын мәнінде тарга саналады.
Мамандар артқы орындықтарын алып, орнына электр жетекті жиналмалы шатыр орнатты, апат болғанда қорғайтын доға да сол жақта тұр. Жарықдиодты оптика, аспаптар панелі, артқы көрініс камерасы, ауа баптағыш, аудиожүйе, жылытқыш сияқты құрылғының бәрі жабық модельден қалған.
Ең қуатты Wuling Mini EV Convertible-дің моторы 41 ат күшіне ие, аккумуляторының сыйымдылығы 26.5 кВт·сағ. Жылдамдығын 100 шақырымға дейін арттыратын көліктің жүріс қоры 280 км-ге жетеді.
Кабриолеттің бағасы әлі белгісіз, бірақ қарапайым Wuling Mini EV-ден үш есе қымбат болады деген болжам бар.
Комментариев: 0