VW Touareg электромобильге айналады

Қазіргі Volkswagen Touareg 2026 жылы өндірістен алынады. Дегенмен концерн танымал атаудан бас тартпай, оны электрлі жол талғамайтын көлікке бермекші.

Automobilwoche басылымы хабарлағандай, батареялы ID. Touareg марканың болашағы зор Scalable Systems Platform (SSP) платформасын пайдаланатын алғашқы модель болады. Компания архитектураны және бағдарламалық жасақтаманы Rivian-мен бірлесіп әзірлеп жатыр. Платформа ID. Golf (электрлі «гольф») және ID. Roc (электрлі T-Roc) модельдеріне негіз болады, бірақ олар түрлі себептерге байланысты кейінірек жарық көреді.

SSP топтамасы аталған модельдермен шектелмейді, себебі Volkswagen Group дәл осы платформаны Солтүстік Америкаға арналған қайта жанданып жатқан Scout брендінде қолданады. Өзара бәсекелестік болмас үшін Scout маркалы көліктер Еуропада сатылмайды, ал ID. Touareg АҚШ нарығында болмайды.

Неміс басылымының мәліметінше, жаңа Touareg 2029 жылы немесе Scout сатыла бастағанда екі жылдан кейін шығады.