VW мен Xpeng жасаған кроссовер туралы тың мәлімет

Volkswagen Anhui кәсіпорны жергілікті Өнеркәсіп министрлігіне ID. Unyx 08 моделін сертификаттауға өтініш берді. Соның арқасында машинаның дизайны мен техникасына қатысты бірқатар ақпараттың шеті шықты. Құжаттағы дерекке сүйенсек, ол қуатты және ұзақ жүреді. Бірақ қашан жолға шығатыны белгісіз.

Автомобильдің ресми суреттері, сертификат фотолары да жаряланды. Одан VW ID. Unyx 08-дің пішіні қытайлық «фольксвагендер» сияқты созыңқы екені байқалады, бүйірі бедерлі, сегменттелген жіңішке жарық техникасы бар. Ұзын жүріс шамдары ортадағы VW логотипіне қарай ойысып, төмен тұрған негізгі блоктармен толыққан.Осы шешім мен капотындағы қатпарларының арқасында алдыңғы буындағы Toyota Camrу-ге ұқсап қалғандай көрінеді. Кроссоверді түрлі түсті тежеуіш суппорттарымен әрлеуге болады, төбесіне мамандар панорамалы ендірме орнатады.

1 / 6

• 
• 
• 
• 
• 
• 

1 / 6

Жаңа көліктің өлшемі — 5000×1954×1672 мм, дөңгелек базасы — 3030 мм, салоны тек бес орынды. Қытай басылымдарының дерегінше Xpeng G9 платформасына негізделетін электрокар 2023 жылы құрылған альянстың алғашқы жобасы атанады. Мамандар автономдық деңгейі 2++ жүргізуші көмекшілерінің кешенін де аталған модельден алады.

Интерьерінің суреті жоқ, дегенмен VW Anhui өкілдері салонын заманға сай әрлеп, сапалы материалдармен қаптаймыз деп уәде берді, онлайн сервистер қосуға да мүмкіндік көп.

Базалық ID. Unyx 08 313 ат күшін беретін электромотормен жабдықталады, қымбатырақ нұсқалары қосымша 190 ат күшіне ие агрегат алады. Инженерлер барлық түрленімге литий-көмір-фосфатты CATL батареясын қояды, бірақ сыйымдылығы белгісіз. Кроссовердің максимал жүріс қоры — 700 км.

Болашақта топтама бес модельден тұрады. Альянс әзірше 06 кроссовері мен 07 седанын ғана көрсетті.