Қытай мен Германиядағы Volkswagen-нің бірдей екі моделінің бағасы әртүрлі. Сол себепті 2023 жылдың аяғында брендтің Германиядағы дилері Қытайдағы FAW-Volkswagen бірлескен кәсіпорны шығаратын Volkswagen ID.6-ны өз еліне жеткізді.
Ықшам Volkswagen ID.3-тің бастапқы бағасы Германияда 40 мың еуро болса, Қытайда оны салоннан 16 мың еуроға алуға болады, ал толық өлшемді ID.7 Vizzion Германияда 57 мың, Қытайда 31 мың еуро тұрады. Демпинг әсерінен болған қатаң бәсеке осындай нәтиже беріп жатыр.
Шу шығарған VW ID.6 құрылымдық жағынан ID.4-тің үш қатарлы ұзарған нұсқасы. Модель тек Қытайда 33.7 мың еуро тұрады, құны 40 мың еуродан басталатын кішкентай ID.4 қана сатып ала алатын немістер үшін бұл өте тиімді ұсыныс болды.
Automobilwoche таратқан мәлімет бойынша Германия көлік басқармасы жабдықтар тізімін біраз жақсартып, бағдарламалық жасақтаманы жаңартқаннан кейін Қытайдан келген ID.6-ны пайдалануға рұқсат беруге дайын болған. Бірақ Volkswagen концерні араласып, электромобильді сатуға мүлде тыйым салды. Сот дилер кіргізген 22 машинаны тәркілеу туралы қаулы шығарып, автоөндірушінің шешімін қолдады.
Оның үстіне Volkswagen-нің заң бөлімі көліктің комплектациясы еуропалық модельден басқа екенін, шұғыл көмек шақыруға мүмкіндік беретін жүйемен жабдықталмағанын айтып, оларды жоюды талап етіп отыр. Бірақ дилер өз дегенінен қайтпайды, ол ID.6-ны заңды түрде әкеліп, неміс билігінің рұқсатын алғандықтан, ешқандай проблема болмауы керек деп ойлайды. Бұл оқиға әлі аяқталмады.
Комментариев: 0