Volkswagen ОАР-да Audi-дің моторы бар Golf жасады

Шығыс Кейп провинциясындағы VW Motorsport ZA жарыс бөлімшесінің штаб-пәтері тауға жылдам көтерілу жарысына арналған болидті жасау үшін қазіргі сегізінші буындағы Golf-ті пайдаланды. Дәл осы жерде Volkswagen Group Africa-ның ірі өндірістік кешені орналасқан. Бұны халықаралық жоба деуге болады.

1 / 7

• 
• 
• 
• 
• 
• 
• 

1 / 7

Жергілікті VW Motorsport бөлімшесінің бас инженері әрі жетекшісі Майк Аллерс бастаған команда шасси архитектурасын жасады. Олар шанаққа хром-молибден болаттан жасалған каркас орнатты және стандарт сыртқы панельдерді карбоннан жасалған бөлшектермен алмастырып, ірі антиқанаты бар TCR болидтеріне тән сұсты аэродинамикалық бастырықпен үйлестірді.

Audi RS3-тің 2.5 литрлік бес цилиндрлі турбомоторын Германиядағы Bar-Tek Tuning ательесінің инженерлері өзгертіп, қуатын 400-ден 1000 ат күшіне дейін арттырды. Қозғалтқыш басқару блогын Аустралиядағы MoTeC компаниясының мамандары әзірледі. Айналу моменті барлық дөңгелекке Sadev компаниясының секвентал трансмиссиясы арқылы беріледі. Көлік трекке арналған аспа және AP Racing тежеу жүйесімен жабдықталған.

Өткен демалыста 1000 ат күшіне ие Golf Преториядағы Zwartkops Raceway трассасында өткен Top of the Hill Challenge сынақ жарысында алғаш рет жұрт алдына шықты. Машинаны зауыттық пилот Джонатан Моготси басқарды. Команданың негізгі мақсаты телеметрия дерегін жинау, электрониканы және аэродинамикалық бастырықты баптау болды.