Үлкен Алматы айналма жолымен жүргені үшін ақы төлемегендер мемлекетке 3 млрд теңге қарыз

Жүргізушілердің Үлкен Алматы айналма жолымен жүргені үшін өтелмеген қарызы 3 млрд 156.5 млн теңгеге жетті. Tengrinews.kz жалпы қарыздың 70 %-ы — жеңіл автомобиль жүргізушірлеріне, қалған 30 %-ы жүк көлігі мен автобустарға тиесілі екенін хабарлады.

Үлкен Алматы айналма жолының ақысын трассамен жүрген соң жеті күн ішінде төлеу керек. Егер берешек болса, банк қосымшасы арқылы оны өтеу туралы хабарлама келеді. Жүргізуші сонда да есеп айырыспаса, жазаға тартылады.

«Ақылы жол ақшасын төлемегендердің үстінен әкімшілік іс қозғалып, айыппұл салынып жатыр. Үлкен Алматы айналма жолымен жүргені үшін ақы төлемеген жүргізушінің ел шекарасынан шығуына тыйым салынады», деп мәлімдеді Көлік министрлігі.

Биыл Қазақстанда ұзындығы 2 мың км болатын республикалық маңызы бар 11 жол бөлігі ақылы болды. Сондай-ақ шенділер жол ақысын 20 % өсіруді жоспарлап отыр.

Әкімшілік кодекстің 628-бабына сай жол ақысын уақытылы бермеген жеке тұлға — 5 АЕК, заңды тұлға 10 АЕК айыппұл арқалайды.