Түркістан облысында төрт жерде трассаның бетон тақтасы көтерілген

Елдің оңтүстігіндегі бетон трассалар тағы бүліне бастады. Соның бірі — Шымкент Солтүстік айналма жолы. 24.kz хабарлағандай, сарапшылар мұндай оқиға құрылыс ақауымен байланысты емес деп санайды. Мамандар жолды жобалаған кезде температураны ескеріп, бес метр сайын арнайы жік орнатады. Бірақ қатты ыстық 10 жыл бұрын салынған жол жамылғысына қосымша қысым түсіреді.

«15 күннен бері күн қатты ысып тұр. Түркістан облысында температура 35-42 градусқа жетті. Қазір ақау шыққан төрт жол бөлігін анықтадық. Ол жерлерде қалпына келтіру жұмысын жүргізіп жатырмыз», — деді «Қазавтожол» ҰК АҚ Түркістан облыстық филиалының басшысы Ербол Пірімбетов.

Оның айтуынша метеорологтар қатты ыстық өңірде бір ай бойы жалғасады деп болжап отыр. Жол жөндеушілер осы кезеңде трассаларды тәулік бойы бақылап отырады.

Бір апта бұрын Астана — Павлодар тас жолында бетон плита көтеріліп кеткен. Ал оңтүстікте мұндай оқиға үнемі болып тұрады. 2021 жылы тексеріс нәтижесінде жол жөндеушілер бетон тақтаның жігін күтіп ұстауды «ұмытып кеткендіктен», жол жабыны бүлінгені белгілі болған. Содан бері бес жыл өтті, бетон жолдардағы жағдай әлі өзгерген жоқ.