Toyota-ның Америкадағы бөлімшесі жаңа автомобильдің артқы бөлігінің сұлбасын көрсетті. Фото мен қысқа видеодан шанақты бойлай орналасқан жарықдиодты жолақты көруге болады. Бренд өкілдері тизерге «Жаңа бір дүние жолда» деген жазба қосты.
Әлеуметтік желіде екі теория бар. Біріншісі — бұл Америка тұрғындарына арналған шағын пикап деген болжам. Өйткені артқы әйнегі тік орналасқан. Екінші теория бойынша жаңа өнім — кроссовер және дәл осы нұсқа шындыққа жанасады.
2021 жылы желтоқсанда Toyota оннан аса концепт көрсеткен, арасында bZ Large SUV деп аталатын модель бар еді. Ол кезде кроссовердің тек алдыңғы бөлігі көзге түсті. Toyota автомобильдің дизайнына құқығын рәсімдегеннен кейін 3D макеттердің арасында жіңішке жарықдиодты жолағы бар артқы бөлігінің суреті пайда болды. Демек жақында марка bZ Large SUV шоу-карының сериялық нұсқасын таныстырады.
Toyota бірнеше жылдан бері АҚШ нарығына 7 орынды электрлі кроссовер ұсынуды жоспарлап келеді. Ол брендтің Кентукки штатындағы зауытында жасалуы керек. Бұған дейін модель bZ5x деген атау алып, 2025 жылы конвейерге тұрады деген ақпарат шықты. Бірақ жаңа өнімді шығару мерзімі кейінге шегерілген сияқты, атауы да өзгеруі мүмкін. Кроссовер bZ Highlander ретінде жарық көруі ықтимал.
Комментариев: 0