Toyota Токиода түрленген үш RAV4-ті көрсетеді

2026 жылы қаңтарда өтетін Токио автосалонына Toyota үш RAV4 прототипін дайындап отыр. Оның екеуі — модельдің ең жаңа, алтыншы буынына, ал біреуі алдыңғы буынға негізделген.

Олардың ішінде хаки түсті RAV4 Outdoor Style аса сұсты көрінеді. Ол 2026 жылғы Adventure нұсқасына негізделген. Биік клиренс, өзгеше қара дөңгелек дискісіне қапталған бұдыр шина, сүйрету ілмегі бар бампер және боялмаған пластиктен жасалған бастырық машинаның жол талғамайтын ерекшелігін көрсетіп тұр. Бұл тізімге төбедегі экспедициялық жүксалғыш пен радиатор қорғанысындағы жарықдиодты жолақты қосуға болады.

Екінші экспонат — RAV4 GR Sport. Суреттен автомобильдің сырт пішіні АҚШ және Еуропа нарығына арналған стандарт нұсқаға ұқсас екені байқалады. Бірақ 300 ат күшіне ие гибрид күштік құрылымы бар мұндай RAV4 Gazoo Racing-тің бірқатар зауыттық аксессуарымен жабдықталады. Бренд толық тізімді көрме кезінде жариялайды.

1 / 6

• 
• 
• 
• 
• 
• 

1 / 6

Үшінші, көк түсті шоукар жақында конвейерден түскен 50-сериялы RAV4-ке негізделген. Стандарт модельден айырмашылығы көп емес, тек шанағындағы дизайнерлік графикамен, жолсызға арналған Toyo Tires шинасымен ерекшеленеді. Әзірлеушілер бұл жобаны шыққан жылына қарамастан кез келген RAV4-ті «жағымдырақ» етіп әрлеуге болатынын көрсету үшін қолға алғанын айтты.

Айта кетейік, машиналарды тюнингтен Modelista студиясы емес, Toyota Industries Corporation (TICO) бөлімшесі өткізді. Бұл компания автокомпонент өндірумен айналысады, сондай-ақ жүк тиегіштерімен, тоқыма өнеркәсібіне арналған жабдықтарымен танымал.