Toyota Land Cruiser 300-ді жаңартады

2021 жылы дебют жасағаннан бері Toyota Land Cruiser 300-ге сұраныс әлі жоғары, бірақ компания бұл көлікті заманауи қылу керек деп шешті. Инсайдерлерге сілтеме жасаған Жапониядағы БАҚ жаңарған модельдің ресми дебюті желтоқсанда өтуі мүмкін, ал саудаға 2025 жылы шығады деп хабарлады.

Toyota әзірге автомобильдің сырт келбеті мен күштік құрылымына өзгеріс енгізуді жоспарлап отырған жоқ. Оның орнына компания машинаның технологиялық мүмкіндіктері мен қауіпсіздігін арттыруға көңіл бөледі. Модель шыққаннан бері индустрия алға жылжыды, сондықтан «крузак» заманға сай болуы керек.

Жол талғамайтын көліктің медиажүйесінде CD және DVD ойнатқышы болмайды. Бренд бұны ешкім қолданбайтынын түсінді, бірақ MicroSD картасына арналған орын қалады. Land Cruiser 300 жетілген жүргізуші көмекшілерімен жабдықталады. Бейімді круиз-бақылау, жолақта ұстау жүйесі және жаяу жүргінші мен велосипедшіні байқау функциясы жаңарады. Бағдарламалық жасақтамасы ғана емес, аппараттық құрамдасы да өзгереді деп күтілуде. Автомобиль жаңа алдыңғы камера мен заманауи радар алады.