Land Cruiser 200 жарық көрген сәттен 14 жыл өткен соң оның ізбасары көпке көрсетілді.
Көліктің сырт бейнесі таңғалдырмады, себебі оның фототыңшылар түсірген суреттері биыл сәуірде жарияланған.
TNGA-F платформасына негізделген автомобиль көзге таныс, оған ірі радиатор торы мен бірнеше жарық техникасы орнатылды. Ұзындығы — 4950 мм, ені — 1980 мм, биіктігі — 1945 мм, ал дөңгелек базасы — 2850 мм. Инженерлер шанақ пен раманың салмағын 200 келіге төмендетті, бірақ жарақталған масса 2.6 тонна деңгейінде қалды.
GR Sport нұсқасы жайлы айта кеткен жөн. Компания оның дизайнын құпия ұстады. Жолсызбен жүруге бейімделген түрленімге қатысты мәлімет кейінірек беріледі, әзірше оны өзге бамперінен, ірі логотип тағылған радиатор торынан және шанақты бойлай орнатылған қорғаныс бастырығынан тануға болады.
Land Cruiser 300-дің салонын ішінара көргенбіз. Суреттері ақпанда желіде тараған. Ал енді интерьерді жақсырақ көруге мүмкіндік бар.
Ең алдымен мультимедиа кешенінің 12.3 дюймдік планшеті орнатылған ортаңғы консоль көзге түседі. Алайда мұндай планшет тек қымбат көлікте болады. Арзандау машина алған адамның 7-10 дюймдік экранды қанағат тұтуына тура келеді. Климат, жылытқыш, желдеткіш және аудиожүйе батырма арқылы басқарылады.
Блоктан сәл төмен Mode Select шайбасы байқалады, оның жанында жүріс режимі мен Toyota Multi-Terrain Select (MTS) жүйесінің батырмалары тұр. Toyota өз клиенттерін диск пайдалану мүмкіндігінен айырмауды жөн көріпті.
Машинадағы аспаптар панелі толық цифрлы емес, бірақ классикалық спидометр мен тахометр арасына үлкен дисплей қойылған. Айта кетерлігі, алдыңғы орындықтардың артына тағы екі дисплей іліп қоюға болады, бірақ бұл опция.
Мамандар модельді жақсарған Toyota Safety Sense қауіпсіздік кешенімен жабдықтады. Оның ішінде көліктерді ғана емес, жаяу жүргіншілер мен велосипедшілерді де көре алатын автоматты тежеу жүйесі бар.
Темір тұлпардың жолсызбен жүру мүмкіндігі жайлы мәлімет аз. Ресми дерек бойынша Land Cruiser-дің кіру-шығу бұрышы өзгерген жоқ, модель жүріс электроникасының баптауын жолға байланысты барынша оңтайлы таңдайтын Multi Terrain Select және Multi-Terrain Monitor («мөлдір капот») функцияларымен мақтана алады. VX нұсқасындағы үш дифференциалды да бұғаттауға болады, ал арзандау көліктерде мұндай мүмкіндік жоқ. VX-тегі тағы бір ерекшелік — гидроцилиндрлі E-KDSS жүйесі. Оны басқа нұсқалардан таба алмайсыз.
Капот астына 415 ат күшін (650 Нм) беретін 3.5 литрлік V35A-FTS бензинді турбомотор орнатылған. Ол 10 сатылы автоматпен жұптаса жұмыс істейді. Кейінірек кейбір нарықта 309 ат күшіне ие (700 Нм) 3.3 литрлік дизельді нұсқа қолжетімді болады. Қазақстан тұрғындарына біз білетін 6 сатылы автоматпен жұмыс істейтін 4 литрлік 1GR ұсынылуы мүмкін.
Су жаңа көліктің біздің елге ресми қашан келетіні және бағасы жуық арада белгілі болады.
Комментариев: 0