Toyota Еуропа мен АҚШ-та көлік бағасын көтереді

Биыл шілде мен қыркүйек аралығында Toyota-ның операциялық табысы 25 % төмендеді. Ал 2021 жылы операциялық табыс маржасы 9.9 %-дан 6.1 %-ға қысқарған. Одан бөлек дәл сол кезеңде таза табысы бірден 434.2 млрд иен (3 млрд доллар), яғни 32 % түсті. Бұл жағдай ең алдымен АҚШ пен Еуропа нарығына әсер етеді деп жазды Carscoops.

Компанияның мұндай қиындыққа тап болуына микрочип жетпеуіне байланысты шығын көбейгені себеп болған. Көз үйренген көрсеткішке оралу үшін Toyota басшылары автомобиль бағасын көтеруге ниетті. Модельдер қаншалықты қымбаттайтыны белгісіз, компанияның қоғаммен байланыс бойынша директоры Дзюн Нагатаның сөзіне сенсек, директорлардың әлі басы қатып отыр екен.

Ол автоөндіруші сатып алушылардың көңілін қалдырмас үшін бағаны аздап қана өзгертуге тырысатынын атап өтті. Мәселен, АҚШ-тағы клиенттер аса танымал Corolla 25-30 мың доллар аралығында сатылады деп үміттеніп отыр.