Toyota Corolla-ның америкалық нұсқасы седан және хетчбэк шанағында шығады, модель аздап жаңарды. Сырттай үлкен өзгеріс байқалмайды. Қымбат нұсқасының шамы өзгерді, седанда артқы бампер дизайны, ал хетчбэкте радиатор торы басқаша болады. Бірнеше жаңа түс және 18 дюймдік дискі қосылады.
Салонда да өзгеріс аз. Ең алдымен 8 дюймдік экраны бар жаңа мультимедиа кешенін айтуға болады. Машина жаңарған Toyota Safety Sense 3.0 электронды көмекшілер жинағымен жабдықталды, аспаптар панелінің графикасында да өзгеріс бар. Олар түрленіміне байланысты 4.2 және 7 дюймді болады.
Жаңарғаннан кейінгі ең маңызды өзгеріс — қарапайым Corolla-ның толық жетекті нұсқасы болады. Бұрын толық жетек GR немесе Corolla Cross кроссоверінде ғана бар еді. Тек гибрид көліктер толық жетекті болады. Олар 1.8 литрлік атмосфералы мотор және бірі артқы осьте орналасқан екі электромотормен қозғалады. Күштік құрылымының қуаты қанша болатыны қазірше белгісіз, алдыңғы жетекті гибрид Corolla 121 ат күшіне ие еді.
Модельдің бензинді нұсқасына 1.8 литрлік (139 ат күші) қозғалтқыштың орнына 2 литрлік (168 ат күші) мотор қойылады. Марка өкілдерінің айтуынша, ол алғашқы жүздікті еңсеретін уақытты қысқартып, жанармай тұтыну мөлшерін азайтады.
Corolla-ның тағы бір нұсқасы ретінде (Қазақстанға келмейді) Morizo Edition деп аталатын саны шектеулі GR Corolla-ны айтуға болады. Ол Акио Тойоданың қалауы бойынша жасалған машина. Хетчбэк артқы диван, динамик, электрлі әйнек көтергіш секілді бірқатар бөлшектен бас тартқандықтан 45 келіге жеңіл болды.
Комментариев: 0