Toyota 1966 жылдан 2021 жылға дейін 50 миллион Corolla сатты. Компания осы жетістікті атап өту үшін модельдің Жапония нарығына арналған арнайы нұсқасын шығарды. Көлік седан, бес есікті хетчбэк және универсал шанағында қолжетімді болады.
Жаңа өнім әдеттегі машинадан сырттай 50 Million Edition тақтайшасы, қара радиатор торы және сол түстес дөңгелек дискісімен (седан мен универсалда 17 дюймдік, хетчбэкте 16 дюймдік) ерекшеленеді. Опция ретінде төбесі мен артқы спойлері де қара түске боялған. Жасанды былғарымен қапталған салоны қызыл, қызғылт сары немесе алтын түсті тігіспен әрленді, мұнда да мерейтойлық тақтайша көзге түседі. Стандарт жабдықтар тізімінде 9 дюймдік сенсорлы экран, алты динамик, ауа тазарту жүйесі және ADAS көмекшілер кешені бар.
Жапонияда барлық «короллаға» қойылатын гибрид күштік құрылым өзгеріссіз қалды. 1.8 литрлік бензинді мотор мен электромотор жалпы 121 ат күшіне ие, момент CVT вариаторы арқылы алдыңғы дөңгелектерге беріледі. Седан мен универсал толық жетекті нұсқада да ұсынылады.
Corolla 50 Million Edition көліктерінің бағасы да белгілі. Ең арзан Corolla Sport хетчбэгінің бағасы — 2.83 млн иен (10.75 млн теңге). Corolla седаны 2.835 млн иенге (10.77 млн теңге) сатылады, ал Corolla Touring универсалы 2.884 млн иен (10.95 млн теңге) тұрады.
Комментариев: 0