Toyota bZ4X электромобилінің жүріс қоры сынақтан өте алмады

Данияның FDM басылымы Toyota bZ4X электромобилінің жүріс қорын тексеріп көрді. Техникалық редактор Сорен Расмуссен нәтиже көңіл көншітпейтінін айтады. Модельдің сынаққа қатысқан екі түрленімі автоөндіруші көрсеткен жүріс қорының жартысын да еңсере алмады.

Автоөндіруші жалғыз моторы бар Toyota bZ4X-тің жүріс қорын 504 километр деп көрсеткен, бірақ журналистер небәрі 246 шақырым жүрді. Ал екі моторлы нұсқасы одан да нашар нәтиже көрсетті: паспорт бойынша 461 км болса, іс жүзінде 215 шақырымға ғана жетті.

Журналистер сынақтан өткізген өзге электромобильдердің көбі бұған қарағанда жақсы нәтиже көрсетті. Мысалы, жүріс қоры 517 км деп жазылған VW ID.4 Pro сынақта 345 км жол жүрді. Толық жетекті Tesla Model Y де паспорттағы көрсеткіштен (507 км) нашар нәтиже көрсетті (355 км).

Сынаққа қатысқан машиналар +4 градус температурада 110 км/сағ жылдамдықпен жүрді. Екі bZ4X-ке де қысқы дөңгелек орнатылған.

Басылымның хабарлауынша, басқа БАҚ-тар өткізген сынақ та осындай нәтиже көрсетті. Оның үстіне Toyota bZ4X сатып алған Норвегия тұрғындары машинаның жүріс қоры аз екенін айтып, шағымданып жүр. Осыған орай Toyota-ның Еуропа мен Жапониядағы кеңселері тексеріс жүргізіп жатыр, бірақ олар әлі ресми мәлімдеме жасаған жоқ.

Toyota бұған дейін де журналистер зерттеуінің нәтижесіне назар аударған. Мысалы, 2019 жылы RAV4 швециялық Teknikens Värld басылымының «Moose test» сынағынан сүрінгенде концерн кроссоверді жақсартқан болатын.