Car Watch басылымы жуық арада «крузак» алуды жоспарлағандардың көңілін түсіретін жаңалық жариялады. Микрочип пен Оңтүстік шығыс Азиядан жеткізілетін басқа да компоненттер жетпей жатқандықтан, Toyota-ның өз еліндегі барлық 14 зауыты жартылай жұмыс істейді. Ал Land Cruiser 300 бен Lexus LX өндірісі қазанда 11 күнге тоқтайды.
Компания жоспарлаған 850 мың машинаның 150 мыңын шығармайды. Осылайша Land Cruiser 300 алу үшін кезегі төрт жылдан кейін келетіндер тағы біраз күтетін сияқты. Клиенттердің сонша ұзақ күтпей, нарықта бар көліктердің бірін алуы әбден мүмкін. Ал мұны пайдаланған дилерлер автомобиль құнын асқақтатады.
Микрочип тапшылығы талай автоконцерн жұмысын тұралатты. Компаниялар енді тығырықтан шығудың жолын іздеп жатыр. Мұның бір шешімі машинаны аса маңызды емес бөлшектерден арылту деп санайтын өндірушілер бар. Нақтырақ айтсақ, Jeep жаңа Grand Cherokee L модельдері пневматикасыз (Quadra-Lift), қарапайым серіппелі аспамен жабдықталатынын хабарлады. Сондықтан пневмоаспа орнатылған көлікке алдын ала тапсырыс берген клиенттерге 750 доллар ақшасы қайтарылады.
Комментариев: 0