Лондондағы үйлердің бірі маңында тұрақта тұрған көлікті айдап кету үшін ұрыларға небәрі 30 секунд қажет болған. Қылмыскерлердің іс-әрекеті бейнебақылау камерасына түсіп қалды. Бейнежазба кадрларынан бір ұрының баспалдақпен үйдің кіреберісіне қарай бара жатқаны байқалады. Ол капюшоны бар күрте киіп, иығына белгісіз электронды құрылғысы бар сөмке асып алған. Әлгі сөмкесінен екі сым шығарады. Қас-қағым сәтте Tesla-ның шамдары жанады да, екінші қылмыскер есігін ашып, көлікке отырады. Электромобиль шамын қайта жағып, оталады да, артқы жүріспен ауладан шыға бастайды. Сол аралықта қолында сөмкесі бар ер адам да ол жерден табанын жалтыратады.
https://www.youtube.com/watch?v=NFRf3Kx9p0c
Dailymail хабарлағандай, соңғы бес жылда Ұлыбританияда автокөлік ұрлығы 50 %-ға артқан. Көбіне қолды болатын кілтсіз темір тұлпарлар екен. Қылмыскерлер көлік иесінің кілтінің сигналын қайта таратады, ал автокөлік кілт жақын маңда деп ойлайды да, есігін ашып, отала бастайды.
Ұрылардан қорғану үшін мамандар ондай көліктердің кілтін сыраның ыдысы сияқты темір құтыда сақтауға кеңес береді. Одан бөлек, кілтті кірер есіктен бес метрден кем қашықтықта сақтамау керек және рөлді механикалық әдіспен бұғаттайтын құрылғыларды орнатып, көлікті жарықтандырылған орынға қойға жөн.
Комментариев: 0