Tesla компаниясының бас кеңсесі жақын арада Калифорниядан Техасқа көшіріледі. Бұл туралы компания басшысы Илон Маск акционерлер жиналысында мәлімдеді.
Tesla-ның штаб-пәтері әу баста Калифорниядағы Сан Карлоста еді, 2010 жылы компания Кремний алқабындағы Пало Альтода орналасты.
Тесла зауыты ұзақ уақыт карантинге жабылып, шығынға ұшырады. Осыған байланысты Маск Калифорния басшылығымен, әсіресе бас санитар дәрігердің шешімімен келіспеді. Компанияның өзге штатқа көшуіне басты себеп осы болып отыр.
Бірақ бұл жанжал туындамаса да, компанияны көшіру идеясы бұрыннан болған. Өйткені Калифорния АҚШ-тағы салық мөлшері мен баға көрсеткіші ең жоғары штат. Tesla Калифорниядан кеткен алғашқы компания емес. Бұған дейін Oracle, HP және Toyota басқа өңірге қоныс аударған. Әрі олардың бәрі бизнес жүргізуге әлдеқайда тиімді Техасқа тұрақтады.
Tesla Техастағы Остин қаласының маңында жаңа гигафабрика салып жатыр. Онда Model 3 және Model Y электромобилі, Cybertruck пикапы және Semi ірі жүк көлігі шығарылады. Осы кәсіпорынға жақын болу үшін Илон Маск былтыр желтоқсанда Техасқа көшіп барды. Оның үстіне Маск басқаратын SpaceX компаниясының ғарыш айлағы да Техас штатында орналасқан.
Бірақ Тесланың Калифорния штаты Фримонт қаласындағы негізгі зауыты жұмысын жалғастыра береді, тіпті алдағы уақытта оның өндірістік қуатын 50 %-ға арттыру жоспарланып отыр.
Комментариев: 0