Tesla Model Y — ең көп сатылатын көлік

JATO Dynamics консалтинг компаниясының есептеуі бойынша әлемдік автонарықта орташа көлемді Tesla Model Y кроссовері көш бастап тұр. Америкалық модель Toyota-ның танымал өнімдерін артта қалдырды.

Былтыр Tesla әлем бойынша Model Y-дың 1 223 000 данасын сатты, осылайша жеткізу көлемі 2022 жылмен салыстырғанда 64 % артты. 2022 жылғы чемпион Toyota RAV4 екінші орынға түсіп, 1 075 000 данасы өтті, ал үшінші орынға 846 000 автокөлік сатқан Honda-ның CR-V моделі жайғасты.

2023 жылдың ең танымал үш моделі де кроссовер. Аналитиктердің айтуынша жалпы сауданың шамамен 47 %-ы осы сегментке тиесілі.

Үздік ондыққа Toyota Corolla, Corolla Cross және Camry, Ford F-150, Toyota Hilux және Nissan Sentra кірді, ал тізімді тағы бір Tesla — Model 3 түйіндеді.

Алайда биыл жағдай өзгерді. Сәуірде Tesla саудасы төмендегені туралы айтылған еді: I тоқсанның қорытындысы бойынша былтырғы осы кезеңмен салыстырғанда 8.5 % және IV тоқсанмен салыстырғанда 20 % төмендеген. Илон Маск сол кезде компанияны ұзақ сауданың тоқырау кезеңі күтіп тұрғанын, бірақ сөзсіз жаңа серпіліс болатынын және ол 2024 жылдың екінші жартысында болуы мүмкін екенін атап өтті.