Tesla бірінші тоқсандағы сауда нәтижесін жариялады. Жыл басынан бері компания 386 810 электрокар сатқан. Бұл сарапшылар болжамынан едәуір төмен, көрсеткіш бұған дейінгі кезеңнен 20 % құлдыраған. Бірақ Tesla үздік электромобиль өндірушісі атағын BYD концернінен бірнеше айдан кейін қайта тарып алды.
Нарық сарапшылары Tesla 450 мың электрокар сатады деп күткен, бірақ компания үмітті ақтай алмады. 2023 жылдың бірінші тоқсанымен салыстырғанда Tesla көрсеткіші 8.5 % түсті. Мамандар Tesla саудасы 2020 жылдан бері алғаш рет төмендегенін айтты.
Model 3 пен Model Y ең көп өтті. Компания үздік модельдерінің 17 мыңнан астамын сатты. Илон Маск бұған бірқатар фактор әсер еткенін айтты. Мысалы, жаңарған Model 3-ті шығару үшін Фремонт зауытын қайта құру жұмысы, экобелсенділердің әрекетіне байланысты Берлиндегі зауыттың уақытша тоқтауы және комплект тасымалдайтын Қызыл теңіздегі жағдайды атады.
Ал BYD биылғы алғашқы үш айда 300 114 электромобиль шығарды, мұны да тамаша нәтиже деуге келмейді. BYD саудасы ақпанда айтарлықтай төмендеді (ресми себеп — Қытай Жаңа жылы). Концерн жұмысы наурызда қайта жанданғанымен, әлемдік электрокар нарығындағы көшбасшы орнын сақтап қала алмады.
BYD гибрид өндірісіне баса назар аударып отыр, демек концерн басшылары қазіргі жағдайға аса алаңдамауы мүмкін. Бірақ сарапшылар ірі өндірушілердің қазіргі нәтижесі электромобиль саудасындағы ұзақ мерзімді тоқыраудың басы болуы мүмкін деп болжап отыр.
Комментариев: 0