Tesla Model Y әлемде ең көп өткен көлік атанды

Focus2Move порталы әлемдегі 162 нарықты зерттеп, биыл сегіз айдағы көлік сату нәтижесін жариялады. Зерттеу нәтижесіне сүйенсек, Tesla Model Y Toyota Corolla-дан озып, 2023 жылы ең көп өткен автомобиль атануға жақын.

Қаңтар мен тамыз аралығында әлемде 758 645 электрокроссовер өтті, Corolla-ның 711 780 данасы иесін тапты. Tesla саудасы 2022 жылдың сәйкес кезеңімен салыстырғанда 76.7 % өсті, ал Toyota-ның көрсеткіші 3.4 % төмендеді.

Model Y биыл рейтингте көш бастайтыны мамырда JATO агенттігі алғашқы үш айдың статистикасын жариялағанда белгілі болған.

Үздік үштікті америкалық Ford F-Series пикап топтамасы түйіндеді. Сегіз айда оның 595 675 (+18.6 %) данасы өтті. Ол өзге модельдер сияқты әлемнің әр түкпірінде сатылмайтынын ескерсек, мұны өте тамаша көрсеткіш деуге болады.

Үздік бестікке Toyota RAV4 (567 196) пен Honda CR-V (434 792) енді. RAV4 саудасы 3.8 % нашарлап, рейтингте екі саты төмендеді, ал Honda көрсеткіші 5.7 % артып, бір саты жоғары көтерілді.

Қазақстанда аса танымал Camry-дің әлемдік нарықтағы көрсеткіші нашарлап барады. Седан сатылымы былтырмен салыстырғанда 6.2 % төмендеді. Биыл әлемде 407 796 Camry иесін тапты.

Focus2Move қытайлық BYD саудасы қызғанын атап өтті. Dolphin және Yuan Plus модельдері 92.5 және 111.7 % өсім көрсетіп, рейтингте 36 және 43-орынға жайғасты.