Беделді басылымның сарапшылары қазіргі таңда АҚШ-та сатылып жатқан алты жеңіл көліктің рейтингін төмендеткен. Олардың ішінде аса танымал Tesla Model 3 электромобилі де бар.
Consumer Reports жүргізген соңғы сауалнама көліктің бояуы мен әрлеу сапасының төмендігін, қатты аяздың әсерінен артқы әйнекке сызат түсетінін, үлкен сенсорлы дисплейдің жұмысында күрделі ақаулар барын анықтаған.
Өкінішке орай мамандар жасаған ескерту, табылған мін мен тағылған сын да шулы үлгінің танымалдығына шек қоя алмады. Model 3 иелері оған аса жоғары баға беріп, түрлі форумдарда пікір білдіру арқылы темір тұлпардың мақтауын асырып жатыр. «Әдетте сенімділікке қатысты қандай да бір мәселе туындаған кезде көлік иелерінің көңіліне қаяу түседі, ал бірақ табынушылары тым көп Tesla сияқты көліктерге келгенде, сатып алушылар оның кемшілігін елемейді», — дейді CR басылымының бас директоры Джейк Фишер. Ол мұндай жағдайлардың Jeep Wrangler мен Chevrolet Corvette көліктерімен де болғанын айтты.
Tesla болса көзге түскен кемшіліктерді түзетіп, CR-дің сенімін қайтаратынына сендірді. Аталған компания өз өнімдеріндегі ақауды қашықтықтан жоюға әбден машықтанған, десе де әйнектегі сызатты кетіру үшін ақылды көлікті сатушыларға қайтаруға тура келеді.
Журнал сатып алуға кеңес бермейтін көліктердің тізіміне Tesla Model 3-тен бөлек, люкс санатындағы Acura RDX (электроникасындағы ақаулар), бесінші сериялы BMW седаны (кілтсіз басқарудағы кемшіліктер, кенет өшіп қалатын экран), Chrysler 300 және Dodge Charger (радионың, дисплейдің дұрыс жұмыс істемеуі, салон әрлеуіндегі кемшілік) сынды темір тұлпарлар бар. Десе де бұл көліктердегі кемшін тұстар қоғам белсенділері мен БАҚ тарапынан аса бір қызығушылық тудырмаған сияқты.
Комментариев: 0