Tesla Model 3 электромобилі KNCAP бағдарламасы бойынша сынақтан өтті. Оңтүстік кореялық сынақ бағдарламасы да басқалар секілді бірнеше краш-тест өткізеді және автоматты тежеу жүйесі сияқты электронды көмекшілерді тексереді.
Модель сынақ қорытындысында 83.3 ұпай жинап, салыстырмалы түрде жақсы нәтиже көрсетті. Демек қауіпсіздік дәрежесі бірінші деңгейге сай деген сөз (бұл EuroNCAP сынағы бойынша бес жұлдызға тең). Бірақ кореялықтар көліктің қауіпсіздігін екінші деңгеймен (төрт жұлдыз) ғана бағалады. Tesla-ның электроникасына олардың көңілі толмады.
Автокөлік жаяу жүргіншілер қауіпсіздігі мен жол апатының алдын алу сынағында төмен ұпай жинады: сәйкесінше мүмкін болған ұпайдың 58.4 және 59.5 %-ы. Бейнежазбадан машинаның автоматты тежеу жүйесі тиімсіз жұмыс істегенін байқауға болады. 45-60 км/сағ жылдамдықпен жүргенде жаяу жүргіншілерді қағып кету ықтималдығы жоғары болды. Ал велосипед мінген жүргінші өтіп бара жатқанда тоқтап үлгермеді (электромобиль нәбәрі 20 км/сағ жылдамдықпен жүрген).
Айта кетейік, 2019 жылы EuroNCAP Tesla Model 3-ті осыған ұқсас сынақтан өткізген. Еуропалықтар модельге бес жұлдыз берді, электронды көмекшілері де барлық жағдайда жақсы жұмыс істеп, 94 % нәтиже көрсеткен.
Осыған қарап жүйе әртүрлі машинада немесе әртүрлі жағдайда басқаша жұмыс істейді деуге бола ма? Tesla-ның жағдайына қарағанда, солай секілді.
Комментариев: 0