Tesla Cybertruck ресми жүріс қорын растай алмады

Out of Spec Motoring каналының электрокар сынаушылары пикапты алғашқы сынақтан өткізді. Алдымен көліктің жүріс қорын сынады. Cybertruck өндіруші мен америкалық Қоршаған ортаны қорғау агенттігі уәде еткен деңгейден 20%-дай төмен нәтиже көрсетті.

Сынаққа бренд ресми хабар бермеген екі моторлы Foundation Series түрленімі қатысты. Жақсырақ жабдықталған бұл машина стандарт нұсқадан шамамен 20 мың доллар қымбат. Foundation Series-ке компания электрокарға ұсынатын барлық қосымша жабдық кіреді.

Пикап опция ретінде ұсынылатын 20 дюймдік дискімен, жол талғамайтын 35 дюймдік шинамен жабдықталады. Компания мамандарының есебі бойынша осындай дөңгелегі бар екі моторлы нұсқа қарапайым Cybertruck Dual Motor-дан 22 миль азырақ, яғни 318 миль (512 шақырым) жүреді.

Кептелісте қалып, энергия жұмсамау үшін мамандар сынақты түнде өткізген. Сол сәтте Техаста ауа температурасы 7 градус шамасында болыпты. Машина сағатына 70 миль (шамамен 112 км/сағ) жылдамдықпен жүрді. Нәтижесінде аккумулятор қуаты толық таусылғанша пикап 254 миль (409 км) жол жүріп өтті. Бұл ресми сипаттамасындағы ғана емес, алдын ала болжанған көрсеткіштен де төмен.

Биыл Tesla «кибертракты» қарапайым шинамен сатады, бұл жүріс қорына оң әсер етуі керек. Температура мен пайдалану жағдайларына қарай жүріс қоры не аз, не көп болады. Сынақ нәтижелерінен компания пикаптың мүмкіндігін жоғары бағалап отырғанын көруге болады.