Премьер-министрге сауал жолдаған мәжіліс депутаты «заңнаманың бұзылмауын қадағалау мақсатында техникалық қарап-тексеру операторларының жұмысын бақылауды күшейту не техникалық тексерістен өту тәртібін алдыңғы қатарлы елдердің тәжірибесіне сүйене отырып өзгертуді» ұсынды. Ерсұлтан Бектұрғанов жарты жыл бұрын ҚР Жемқорлыққа қарсы іс-қимыл агенттігінің коррупциялық тәуекелге жол бермейтін тиімді тексеріс жүйесі әзірленгенше автокөліктерді техникалық тексерістен өткізуді тоқтатуға кеңес бергендігін атап өтті. Бармақ басты, көз қыстылықпен күресушілер біздің елде техникалық қарап-тексерудің тек шартты түрде жүзеге асатын шараға айналғанын және көлік иелеріне қосымша қаржылық жүктеме артатынын айтқан.
Депутаттың сөзінше, содан бері жағдай еш өзгерген жоқ. Қазақстанда тіркелген 500 техникалық тексеріс операторының көбі тек құжатқа тиісті белгі қою үшін он минут ішінде не қашықтықтан, яғни WhatsApp арқылы жіберілген фотосуретке қарап тексерістен өткізе береді. Ал көлік иелері машинаның жағдайын тексергеннен, ақша төлей салғанды жөн көреді. 2013 жылы Қазақстанда техникалық тексерістен өткізетін операторлардың 98 мың рет заң бұзғаны анықталды.
Комментариев: 0