Porsche-ның жаңарған Cayenne топтамасы Turbo E-Hybrid деп аталатын жаңа модельмен толықты. Флагман жақсарған электромотор мен 4 литрлік V8-ге, жаңа пневмоаспаға ие болды, сырт пішіні қатал көрінеді. Еуропада автомобильге тапсырыс қабылдап жатыр, бағасы 176 324 еуродан (87.7 млн теңге) басталады.
Күштік құрылым битурбиналы V8 (599 а.к.) бен электромотордан (176 а.к.) тұрады. Екі мотордың жалпы қуаты 739 ат күшіне тең, айналу моменті — 950 Нм. Бұған дейін 680 ат күшіне ие Cayenne гибриді ең қуаттысы болды.
Кроссовердің электрлі бөлігі әлдеқайда сыйымды 25.9 киловаттық батареямен толықты. Мұндай электр күшімен Cayenne 70-82 шақырым жол жүреді.
Стандарт аспаптар жинағында күш векторын бақылау жүйесі, екі камералы жаңа пневмоаспа және екі клапанды бейімді амортизатор бар. Бренд осылайша жүрісті баптауға болады деп сеніп отыр. Толық басқарылатын шасси опция түрінде қолжетімді.
Аса қуатты Porsche Cayenne-ді шанақ бастырығы, тот баспайтын темірден жасалған қосарлы екі келтеқұбыры және қызыл тежеуіш суппорты ерекшелейді. Салонда спорттық рөл мен 18 бағытта реттелетін спорттық кресло бар. Клиенттің қалауы бойынша компания оны ыңғайлы орындыққа ауыстырып беруі мүмкін.
Марка купе шанақты GT супергибридінің опциялық пакетін де таныстырды. Оған басқа аспа баптауы, анағұрлым жалпақ дөңгелек дискілері және композит тежеуіштер кіреді. Шанағын қара жапсырмалармен сәндеп, кейбір элементін карбоннан, ал газ шығаратын түтігін титаннан жасайды. Бұл Cayenne алғашқы жүздікті 3.6 секундта алады, ең жоғары жылдамдығы — 305 км/сағат.
Porsche Cayenne Turbo E-Hybrid Coupe GT — экологиялық шектеуге байланысты стандарт Turbo GT-ді сатуға болмайтын аймақтарға арналған модель. Бағасы да арзан емес. Мысалы, Германияда кроссовер 208 454 еуро (103.7 млн теңге) тұрады.
Жаңа Cayenne өзімен бір күштік құрылымды бөлісетін гибрид Lamborghini Urus-тың мүмкіндігінен хабар беретін сияқты. Тек бензинмен жүретін «урус» сатылып жатқан жоқ, ал электрлі кроссовер 2024 жылы шығады.
Комментариев: 0