Біршама уақыттан бері жаңа автокөлік нарығында үздіксіз өсім болған еді, бірақ тамызда көрсеткіш төмендеді. Сұраныс болғанымен, салондарда машина қалған жоқ.
Әлемдік және қазақстандық автонарыққа әсер еткен басты мәселе — жартылай өткізгіш пен микрочип тапшылығы. Автокөлікке сұраныс қайта қалпына келгеннен кейін автоөндірісте электронды компонент жетіспей жатыр. Сол үшін жаңа машина дұрыс жеткізілмеуде, тіпті кейбір автозауытта жұмыс тоқтады.
Екінші мәселе — дилерлер мен өндірушілер Қытай арқылы әкелінетін автобөлшек пен автокөлік жеткізуде қиындыққа ұшырап отыр. Тауар жөнелту кезегі алдағы бірнеше айға созылып кеткен.
ҚАБА мәліметіне сүйенсек, автонарық былтырғы тамызбен салыстырғанда 5.5 %-ға төмендеді, ал 2021 жылы шілдедегі көрсеткіштен 15 %-ға төмен. Тамызда барлығы 9093 жаңа машина (коммерциялық көліктерді қосқанда) сатылды.
Жаздың соңғы айында ең көп сатылған үш марка — Chevrolet, Hyundai және Toyota. Chevrolet дилерлері шілдеде 3094 машина сатса, тамызда 2194 дана (-29 %) ғана саудалай алды. Сол секілді сатылған Hyundai көліктері 2012 данадан 1568 данаға (-22 %) азайды. Тамызда үздік үштікке енген Toyota 1012 машина (-15 %) сатты. Төртінші қатарға ығысқан Kia-ның 825 данасы (-32 %) ғана өтті.
Тізімнің төменгі жағында өзгеріс болды. Жақсы сатылған Qashqai-дің арқасында Nissan жетінші орынға көтерілді, ал BMW тарихта алғаш рет ең танымал маркалар тізімінде үздік ондыққа енді.
2021 жылғы тамыз қорытындысы бойынша жаңа көліктер нарығындағы үздік 10 марка
| Орын | Марка | 2021 жылдың тамызындағы сатылым (дана) |
| 1 | Chevrolet | 2194 |
| 2 | Hyundai | 1568 |
| 3 | Toyota | 1012 |
| 4 | Kia | 825 |
| 5 | Lada | 716 |
| 6 | Volkswagen | 356 |
| 7 | Nissan | 331 |
| 8 | JAC | 328 |
| 9 | Renault | 308 |
| 10 | BMW | 114 |
Танымал модельдер тізімінде үлкен өзгеріс болған жоқ. Көш басында Chevrolet-нің қос моделі (Cobalt пен Nexia) және Hyundai Accent. Жаңарған Camry төртінші орынға жайғасты. Жаңа Hyundai Elantra көптен бері бірінші рет бестікке енді. Шілдеде Lada көліктері алғашқы ондықтан көрінбеген еді, ал тамызда Largus универсалы алтыншы сатыға көтерілді. Hyundai Tucson үздік он модельдің қатарына оралды.
Мамандар пікіріне сенсек, көлік тапшылығы кем дегенде биыл жыл соңына дейін жалғасады (келер жылға дейін созылады деген де болжам бар). Бірақ жылдық көрсеткіш бойынша автонарық қазірше оң нәтиже көрсетіп тұр. 2021 жылдың алғашқы сегіз айында елімізде 76 039 жаңа машина сатылды. Бұл 2020 жылғы көрсеткіштен 42.5 %-ға артық.
Комментариев: 0