Автомобильмен жолаушы және жүк тасымалдау ережесіне өзгеріс енді. Ол 16 қазанда күшіне енеді. Бұдан былай адам тасымалдайтын жүргізушілер рейс алдындағы тексеруден қашықтан және офлайн өте алады.
Тексеруден өту үшін тонометр, пульсометр, алкотестер және артериялық қан қысымын, жүрек соғу жиілігін (пульс), температура және ішімдік ішкенін не наша шеккенін анықтайтын сертификатталған медициналық кешендер қолдануға рұқсат береді.
Тексеріс мына ретпен жүзеге асады:
- биометриялық және (немесе) басқа жолмен тұлғасын анықтау;
- шағымдарының бар-жоғын онлайн сұрап білу;
- қоздырғышқа қарашықтың реакциясын өлшеу тесті;
- мастықты анықтайтын тест;
- дене температурасын өлшеу;
- артериялық қан қысымы мен пульсін өлшеу.
Автоматтандырылған жүйе барлығын суретке не видеоға түсіріп тұрады, осылайша жалған нәтиже көрсету фактісін жоймақ. Жүргізушілерді мұндай кешенмен тасымалдаушы компания өзі қамтамасыз ету керек.
Қашықтан дәрігерлік тексеру процесін заңдастырды, бірақ елімізде тікелей барып тексерілетіндер жоқтың қасы. Автобус парктері мен трамвай депосында талап сақталғанмен, таксопарктер мен өзіне қызмет көрсететін жүргізушілердің бұны пайдалануы екіталай.
Комментариев: 0