Suzuki экологтарға ұнамайды

Экологиялық Greenpeace ұйымының Шығыс Азиядағы филиалы әлемдік автоөндірушілердің іштен жанатын қозғалтқыштан бас тарту қарқыны жайлы рейтинг жасады. Әдетте ұйым белсенділері наразылық акциясына шыққанда осындай тізімді басшылыққа алады.

Биылғы рейтингте Suzuki ең төмен орын алды, марка топтамасында электромобиль жоқ, тек жұмсақ гибрид пен PHEV бар, сол үшін компания мүмкін болған 100 ұпайдан 3.2 ұпай ғана алды. Бірақ Toyota, Nissan және Great Wall (Қытай) сияқты өзге азиялық компаниялар да тізімде соңғы орындарда тұр.

Гринпис стандарты бойынша толық ұпай жинау мүмкін емес, бірінші орында тұрған Mercedes-Benz-тің өзі небәрі 41.1 ұпай алды, ал BMW-ның еншісінде — 40 ұпай. BMW топтамасының 10 %-ы ғана батареялы модель, ал Mercedes-Benz-те бұл көрсеткіш — 7.25 %. Оның үстіне белгілі бір компания қызметін бағалағанда экологтар көлік жеткізу кезіндегі декарбонизация сияқты факторларды да ескереді.

Басқаша айтқанда, тек электромобиль шығару жеткіліксіз, өндіріс процесі, логистика, тіпті бөлшек пен материал жеткізушілер де қоршаған ортаға зиян келтірмеуі керек.