Stelato S9T моделіне бір тәулікте 20 мың адам тапсырыс берді

Премиум көлік шығаратын Stelato бренді S9T универсалына 24 сағат ішінде 20 мың тапсырыс түскенін хабарлады. Жергілікті басылымдар жаңа өнімнің жоғары бағасы мен елде бұл шанақ түрі аса танымал еместігін ескеріп, тамаша нәтиже деп жазды. Бірақ шынайы сұраныс деңгейі тікелей сату процесі басталған соң белгілі болады.

1 / 4

• 
• 
• 
• 

1 / 4

S9T — Stelato маркасының Huawei және BAIC-мен бірге жасаған екінші моделі. Ол S9 седанымен бір платформаны бөліседі. Бес есікті көліктің ұзындығы — 5160 мм, дөңгелек базасы — 3050 мм, жүксалғышының көлемі — 660 литр. Бренд оны Қытай нарығына 309 не 523 ат күшіне ие моторы мен 100 киловаттық CATL батареясы бар универсал ретінде және күштік құрылымы электромотор (309 а.к.) мен 160 ат күшін қосатын 1.5 литрлік дәстүрлі қозғалтқыштан тұратын гибрид ретінде ұсынады. Жүріс қоры 801 және 1305 шақырымға жетеді.

Машинаның стандарт жабдықтар тізіміне пневмоаспа, Huawei әзірлеген төрт лидарлы ассистенттер кешені, үш дисплейі мен 25 динамигі бар медиажүйе кіреді. Қосымша ақы төлеп, бүйірлік айнаны камераға ауыстыруға болады.

Stelato S9T-дің төрт түрленімі шығады: екеуі гибрид, екеуі электромобиль. Бағасы 328-388 мың юань (24.6-29 млн теңге) шамасында. Алдын ала тапсырыс беру үшін 2000 юань (150 мың теңге) төлеу қажет. Ойынан айнып қалған кісі кез келген уақытта ақшасын қайтарып алады. Сол себепті де сұранысқа қатысты нақты мәлімет алу үшін әліптің артын бағып, тікелей сауда басталғанын күту керек.