Huawei мен BAIC бірлесіп Stelato брендімен универсал шығарады

Huawei мен BAIC альянсы құрған Stelato маркасы өздерінің келесі моделінің алғашқы суреттерін жариялады. Жаңа өнім S9T индексін алды және қазір сатылып жатқан S9 седанының платформасына негізделген. Ол Huawei қатысқан брендтер жүйесіндегі алғашқы универсал болмақ және шетел нарығына арналған болуы мүмкін.

Универсалдың алдыңғы бөлігі седаннан аса қатты ерекшеленбейді. Шанақ элементтері сақталған, айрықша бампер және ұқсас жарық техникасы бар. Бірақ S9T-дің төбе сызығы көлденең келген, артқы тірегі жалпақ және бірегей артқы шам алған. Жүксалғыш қақпағына ірі спойлер орнатылған.

Қытай басылымдары интерьер құрылымы мен мотор гаммасы өзгермейді деді. Автомобиль S9-дағы қозғалтқыштармен жабдықталады. Көлік не гибрид, не толық электрлі нұсқада болады. Гибрид 308 ат күшіне ие электромотормен және 160 ат күшін беретін 1.5 литрлік іштен жанатын қозғалтқышпен жүреді. Ол қайта қуаттаусыз әрі жанармай құймай 1256 шақырым еңсере алады. Электромобиль артқы немесе толық жетекті болады, мотор қуаты — 306 не 523 ат күші, жүріс қоры — 721-816 км.

Маусымда Stelato Қытайда S9 моделінің 4154 данасын сатқан. CarNewsChina басылымы бұл көрсеткішті 300 мың юаньнан (22 млн теңге) қымбат электрлі седандар арасындағы үздік нәтиже деп атады. Дегенмен универсал Қытайда аса жоғары сұранысқа ие емес. Сондықтан Stelato бұл жаңа моделін шетел нарығына шығаруды жоспарлап отырған сияқты.