Sokol-ға айналма мотожарыс қайта оралады

2026 жылы жазда Алматы — Астана трассасының 76-шақырымында орналасқан Sokol автодромында айналма мотожарыс өтеді. Мұндай жарыс алғаш рет осыдан он жыл бұрын, «Сокол» картодромы енді ғана ашылған кезде өткен. Сол кездегі турнирлердің біріне қонақ ретінде үш дүркін MotoGP чемпионы Хорхе Лоренцо келген. Мотобәйге кейінгі бірнеше жылда ара-тұра өтіп жүрді де кейін мүлде тоқтап қалды.

1 / 13

• 
• 
• 
• 
• 
• 
• 
• 
• 
• 
• 
• 
• 

2014 жылдың қазанында Sokol автодромында өткен алғашқы Superbike Challenge жарысы

1 / 13

Енді Sokol кешені мотожарысты қайта қабылдағалы отыр. Жаңа Sokol SBK Cup сериясының алғашқы кезеңі 27 маусымда өтеді. Ұйымдастырушылар 2026 жылы жарыстың төрт кезеңін өткізуді жоспарлап отыр. Алғашқы жарыс картодромда өтеді, кейін шабандоздар MotoGP стандартына сай келетін 4.49 шақырымдық негізгі айналма трассаға ауысады.

Шабандоздар үш класс бойынша сынға түседі. Ең төменгі санат — Open 400. Ол Kawasaki Ninja 400, KTM RC 390, CFMoto 450SR сияқты қозғалтқыш көлемі шағын және орта мотоциклдерге арналған.

Ортаншы санат — Supersport. Бұл топта Yamaha R6, Honda CBR600RR сияқты классикалық 600 текше сантиметрлік техникалар және Yamaha R9, Ducati Panigale V2, Triumph 675R қатарлы қозғалтқыш көлемі үлкенірек мотоциклдер бақ сынайды.

Ең жоғарғы класс — Superbike. Мұнда Yamaha R1, Honda CBR1000RR, Suzuki GSX-R 1000, Ducati Panigale V4, BMW S1000RR сияқты мотоцикл иелері жарысады.

Жарыстың нақты кестесі іс-шара өтетін күн жақындағанда белгілі болады. Кіру ақылы. Билет бағасы — 3500 теңге.