Қазір көп автоөндіруші істен шыққан электромобиль батареяларын одан әрі пайдалану мәселесіне бас қатыруда, олардың қатарында Škoda да бар. Қуатынан айырылған аккумуляторды стационарлы энергия сақтау құрылғысын жасауға пайдалану ұсынылды. Алғашқы үлгі Прагада сынақтан сәтті өтті. Жаңа кешенге Чехия, Германия, Нидерланды және Словакиядағы сатушылардан 160 тапсырыс түскен.
Стандарт құрылғы 20 гибрид (әрқайсысының батарея қуаты 13 кВт.сағ) немесе бес электромобиль батареясынан тұрады (82 кВт.сағ). Батареялар «шкоданың» Superb iV, Octavia RS iV, Enyaq iV секілді модельдерінен және олардан кейінгі машиналардан алынады. Қазірше донор көп емес, бірақ олардың саны артатыны сөзсіз.
Құрылғы күн сайын күн нұры, жел секілді табиғи энергия көздері арқылы толтырылады. Содан кейін ол тұтынушыны қажетіне қарай электр көзімен қамтамасыз етеді (жарықтандыру, салқындатқыш) немесе электромобиль сервисіне келушілерге қуаттау бекеті ретінде қызмет етеді. Осылайша қуаты таусылған батареялардың қызмет ету мерзімі 15 жылға дейін ұзарады. Содан кейін оларды бөлшектеп, қайта өңдеуге жібереді.
Комментариев: 0