Америкадағы онлайн-аукциондардың бірінде сирек кездесетін Toyota Mega Cruiser саудаға шықты. Концерн 1990 жылдардың аяғында мұндай көлікті армия мен төтенше жағдай қызметіне арнап шығарған, ал қарапайым нұсқаның 133 данасы ғана жарық көрген. Сирек кездесетініне және жағдайына қарамастан, аукционның аяқталуына екі күн қалғандағы бағасы 41 мың доллар (шамамен 20 млн теңге) болды.
Бес метрлік жол талғамайтын көлік 420 миллиметр клиренсімен және толық басқарылатын шассисімен ерекшеленеді. Өлшеміне қарамастан, Mega Cruiser-дің салоны екі қатарлы, бірақ артқы орындық төрт адамға арналған. Аукционға шыққан модельдің орындықтары матамен қапталған, ал жабдықтар тізіміне кондиционер, электрлі әйнек көтергіш және стереожүйе кіреді. Автомобильдің штаттық нұсқасында шатырға шығатын баспалдақ пен қосалқы дөңгелек ілетін кронштейн бар.
Mega Cruiser 4.1 литрлік дизельді мотормен жүреді. Ол 155 ат күшін және 382 Нм момент береді және 4 сатылы автоматпен жұптасады. Трансмиссияда үлестіргіш пен бұғатталатын үш дифференциал бар.
Бұл экземпляр 1997 жылы конвейерден түскен. Алғашында Mega Cruiser ашық көк түсті болған, кейін оны күңгірт түске бояған.
АҚШ-та Toyota Mega Cruiser шамамен 100 мың доллар тұрады, дегенмен одан қымбатқа өткендері де болған. Былтыр күзде сол рөлді және салоны қайта жасалған, Қазақстаннан Америкаға жеткен осындай автомобиль онлайн-аукционда 310 мың долларға саудаланған еді.
Комментариев: 0