Осындай көп жанармай тұтынатын, баяу жүретін және қала ішінде ыңғайсыз көліктердің керемет күйде сақталуының құпиясы — иелерінде. Ыңғайлы және фуллсайз автомобильді әдетте егде жастағы кісілер алады. Олар машинаны сирек пайдаланып, ұқыпты ұстайды. Иесі өмірден өткеннен кейін автомобиль балаларына мұра болып қалып, көп жағдайда әкесінен қалған естелік ретінде сақталады.
Осындай сирек кездесетін көліктердің бірі Bring a Trailer-де саудаға шықты. Бұл — Флорида штатындағы Помпано-Бичтен шыққан 1976 жылғы Cadillac Fleetwood Brougham. Жарты ғасыр ішінде шатыры винилмен қапталған күміс түстес седанның үш иесі ғана болыпты. Темір тұлпардың одометрі 38 мың мильді (61 мың км) көрсетіп тұр. Сатушы капот пен жүксалғыштың бояуын жаңартқан. Басқа бөлшектері жөндеуді қажет етпепті.
Раритеттің қазіргі құны — 10 мың доллар, бірақ жұма күні сауда аяқталғанша бағасы әлі өседі. Хабарландыру астындағы пікірлерден Fleetwood Америка автоөнеркәсібін бағалайтындар арасында жоғары беделге ие екенін көруге болады. Біреулер үшін бұл — ностальгия, ал енді біреулер үшін — ұмыт болған дәуірдің бір жәдігерін алып қалу мүмкіндігі.
Бұл модель несімен ерекше? 1975-1976 жылдардағы Cadillac Calais, DeVille және Fleetwood модельдері өз тарихындағы автомобильдер арасында ең үлкен өлшемдерге ие. Ұзындығы — 6 метрге жақын, ені — 2 метрден асады, ал дөңгелек базасы — 3.5 метр. Бұлар ірі бамперден бөлек, алғаш рет қосарлы төртбұрыш фар (бұрынғысы дөңгелек болған), алдыңғы эйрбэг пен ABS жүйесін алды.
7.7 және 8.2 литрлік карбюраторлы V8 моторлары 210-215 ат күшін беретін. Трансмиссиясы — үш сатылы Turbo Hydra Matic автоматы. Мұндай күштік құрылымы бар автомобиль асықпай әрі жайлы жүруге арналған, тас жолдарда ғана жылдам қозғалады.
Мұндай Cadillac-тың екі есікті нұсқасы «Брат-2» фильміндегі Данила Багровта болған. Ұқсас көлікті «Горецтегі» антагонист жүргізді, Джимми Хоффа туралы фильмде басты кейіпкердің соңғы көлігі ретінде көрсетілген.
Комментариев: 0