Вальтер Трезер — Audi көліктерін жоғары бағалайтындарға таныс есім. Неміс компаниясында 1976 жылдан бастап арнайы жобалар бөлімін басқарған маман Audi 100 Quattro авторларының бірі және марканың спорттық модельдеріне «кватро» атауын берген маман. Мансабын аяқтаған соң инженер сериялы Audi модельдерін клиенттің талғамына сай түрлендірумен айналысатын ателье ашты.
1993 жылы Трезер клиенттеріне Volkswagen Polo Treser GT көлігін ұсынды. Ол шатыры алынатын купе-кабриолет болатын. Идея жаңа деп айта алмаймыз, мұндай машиналар соғыс басталмай тұрып Peugeot-дан, ал 50 жылдардың аяғында фордтық Skyliner-ден жасалды. Бірақ олар ірі еді, ал Трезер шағын Polo-ның жиналмалы шатырын жүксалғышқа салып қана қоймай, жүк қоятын орын қалдыра білді. Мұны Volkswagen ресми мақұлдап, Treser GT-ге концерн дилерлері қызмет көрсетті.
Бұл түрленім арзанға түскен жоқ. Егер базалық екі есікті Volkswagen Polo сол кезде 18 мың марка (13 700 еуро) тұрса, ерекше көлікке тапсырыс берген адамның оған қосымша 16 мың марка жұмсауына тура келді. Дегенмен Polo Treser GT-дің 290 данасы жасалды. Солардың бірі қазір сатылып жатыр. 91890 шақырым жол жүрген автокөліктің бағасы — 11 900 еуро.
Комментариев: 0