18 шілдеде мемлекет басшысы жаңа Салық кодексіне қол қойды. Құжат 2026 жылдың 1 қаңтарынан бастап күшіне енеді. 565-баптың 8-тармағында енді былай жазылған:
«жеңіл автомобиль салығын есептеген кезде, көлік құралының пайдалану мерзіміне, шыққан жылына сәйкес мына коэффициент қолданылады:
- пайдалану мерзімі 10-20 жыл — 0.7;
- 20 жылдан асса — 0.5».
Яғни, 11–20 жыл бұрын шыққан көлікке 30 % жеңілдік берілсе, 21 жылдан асқанға 50 % жеңілдік қарастырылған.
21.07.2025,
11:00-де толықты:2026 жылдың 1 қаңтарынан бастап күшіне енетін салық мөлшерлемесі кестесінде 2013 жылдың 31 желтоқсанынан кейін Қазақстанда алғаш тіркелген, қозғалтқыш көлемі 3000 текше
см-ден асатын көлікке қатысты жоғары тариф бөлімі болмайды. Қозғалтқыш көлемі3-4 литр машинаға мөлшерлеме 35 АЕК көлемінде болады, әрбір артық текше сантиметр үшін 7 теңге қосылады, 4 литрден асса — 117 АЕК, осы шектен асқан сайын дәл осылай өсіп отырады.
Сонымен қатар мұндай көлікке де басқа машиналардағыдай жеңілдік қарастырылған: мысалы, 35 АЕК емес, 17.5 АЕК болуы мүмкін. Көлемі үлкен қозғалтқышы бар, шыққанына 10 жыл болмаған көлік үшін салық жоғары мөлшерлемемен емес, стандарт —
35 АЕК-тен немесе117 АЕК-тен бастап есептеледі.
2026 жылдың 1 қаңтарынан бастап құны 18 000 айлық есептік көрсеткішке тең және одан жоғары жеңіл көлікке акциз қолданылады. Салық кодексінің 536-бабы, 10-тармағы.
537-бапта көлік құралы құнының 10 %-ына тең болатын акциз салынатыны жазылған. Автомобильді алғаш тіркегенде де, ел ішінде қайта сатқанда да осы соманы төлеу қажет.
2026 жылғы АЕК мөлшері әлі бекітілмеген, бірақ үкімет оны 4148 теңге болады деп болжады. Осылайша құны 74 664 000 теңгеден жоғары машинаға қосымша салық салынады. АЕК мөлшері артқан сайын бұл шек өзгеріп отырады.
Билік шетелден импортталатын көліктің құнын шот-фактура (инвойс) арқылы, ал ел ішінде тіркелген және сатылатын автомобильдің бағасын сатып алу-сату келісімшарты арқылы анықтайды.
Комментариев: 0