Оқиға биыл, қыркүйектің 17-сінен 18-іне қараған түні Бәйдібек би даңғылында орын алған, деп хабарлайды «Отырар ТВ». Мотоцикл мен арнайы көліктің соқтығысуы салдарынан 18 жасар жолаушы қыз зардап шеккен. Полиция қызметкерлері мотоцикл тізгіндеген адамның погон таққандарды көре салысымен қашпақ болғанын, бірақ рөлге ие бола алмай, олардың көлігіне соғылғанын айтады.
«Біз жолда еш асығыссыз келе жатқанбыз. мотоциклмен теңескенде, біз жәй ғана тоқтамақ болдық. Бірақ мотоциклдің тізгініндегі адам бізді көре салысымен қашуға әрекеттенді. Мотоциклдің артқы бөлігінде отырған жолаушы қыз көлік құралынан секіріп кетті де, мотоциклші рөлге ие бола алмай, бізге соғылды», — дейді тәртіп сақшылары.
Ал мотошабандоз Рафаэль Галметовтің нұсқасы басқа. Оның айтуынша, тәртіп сақшылары мотоциклді әдейілеп соққан көрінеді. Ал бұл мәселенің ақ-қарасын тергеушілер анықтайтын болады. Қазіргі сәтте олар жол полицейлерінің жетондарына тіркелген бейнежазбаны мұқият зерттеуде.
Естеріңізге сала кетейік, тәртіп сақшыларының арнаулы құралдар мен дене күшін қолдануын реттейтін «Құқық қорғау қызметі туралы» республикалық заңның 60-бабының 1-тармағында «Егер жүргізуші қызметкердің тоқтату жөніндегі заңды талаптарына бағынбаса, көлік құралдарына ақау келтіру арқылы оларды тоқтату үшін қолдануға құқығы бар» деп жазылған 8-тармақшамен толықтырылған болатын. Басқаша айтқанда, ереже бұзушылар қашпақ болған жағдайда, тәртіп сақшыларына олардың көлігін соғуға ресми түрде рұқсат берілген.
Комментариев: 0