Шымкентте LRT салынады

Кезекті брифинг кезінде қала әкімі Мұрат Әйтенов Шымкент қаласында жүрдек трамвай жолын салу жоспарланғанын айтты. «Хабар 24» арнасы қалада алдағы 10–12 жылда LRT пайда болады деп хабарлады.

«Халық санының артуына байланысты биыл бас жоспарға өзгеріс енгізіп жатырмыз. Тұрғындар өз ұсынысын білдіру үшін бір ай уақыт бердік. LRT, BRT қосылып жатқанын көріп жүрсіздер. Сарапшылар миллион адам тұратын қалаға осындай көлік керек дегенді алға тартты. Қазір LRT мен BRT сызбалары дайындалып жатыр. Барлығы біткен соң бұны билікке жеткіземіз», — деді әкім. Сонымен қоса ол жобаның жүзеге асуы инвесторлар мен бюджеттің мүмкіндігіне байланысты болатынын айтты.

Шымкентте жүрдек трамвай жолы Астана мен Алматыдағы сияқты бос сөзге айналмай, ертерек салынады деп үміттенеміз. Елордадағы бетон тіреулер 2011 жылдан бері әлі тұр. Құрылысқа миллиардтаған қарыз алған болатынбыз. Бірақ соңғы жылдары жұмыс тоқтап, оның басы-қасында жүргендер сотты болды. Биыл құрылыс қайта басталды. Шенділер Астанада LRT жолы 2024 жылдың аяғында іске қосылады деп уәде беріп отыр.

Ал Алматы әкімдігі соңғы 10 жылда LRT-ның бірнеше жобасын ұсынып үлгерді. Биыл Орбита ықшам ауданы мен темір жол вокзалына қатынайтын жүрдек трамвайды іске қосу туралы ұсыныс білдірді. Төрт жыл бұрын жергілікті шенділер құрылыстың басталғанын хабарлаған, бірақ ол сызба күйінде қалды. Алматы облысындағы G4 City қаласын дамыту концепциясында Алматыдан Қонаев (бұрынғы Қапшағай) қаласына дейін LRT жолын салу жоспары бар.