Шығыс Қазақстан облысының полиция департаменті хабарлағандай, биыл 1 шілдеден бастап мердігер компания мен жергілікті атқарушы орган арасындағы келісімшарт мерзімі аяқталуына байланысты жолдағы бейнетіркеу қызметі тоқтап тұр. Tengriauto.kz порталы Sergek Group пен облыс әкімдігі арасындағы мемлекеттік-жекеменшік әріптестік келісімнің мерзімі аяқталғанын анықтады.
«Барлық жабдық және аппараттық-бағдарламалық кешен қабылдау-тапсыру актісіне сәйкес берілді», — деді компанияның коммуникациялар жөніндегі директоры Әсел Қожахметова. Оның айтуынша Sergek Group «техникалық тұрғыда іріктеу талаптарына сәйкес келмеуіне» байланысты мемлекеттік сатып алу конкурсына қатыса алмады.
Шығыс Қазақстан облысының жолаушы тасымалы және автомобиль жолдары басқармасы Satory Company LTD ЖШС-мен қызмет көрсету шартын жасағанын хабарлады. Дәл осы компания жақында Өскеменде 2000 дана қосымша камера орнатады. Олар Риддер мен Алтай қаласында да жаңа камералар қояды.
«Жоба аясында полиция ұсынған бағдарламаға сай 243 жаңа бақылау комплексін (143-і жолда, 100-і қиылыста) орнату жоспарланған. Сондай-ақ 1900 бейнебақылау камерасын орнату, қолданыстағы 160 бақылау комплексін жаңату арқылы 1232 бейнебақылау камерасын орнату және қазір жұмыс істеп тұрған 1700 камераны орталықтандырылған платформаға қосу міндеті тұр», — деп хабарлады басқарма.
Sergek Group Kolesa.kz редакциясына өзге аймақтарда олар орнатқан камера бұрынғыдай жұмыс істеп тұрғанын хабарлады.
Комментариев: 0