Бұған дейін «Газель» жүргізушісі Шығыс айналма жолда алдыңғы әйнегіне әлдекімнің тас лақтырғанын айтып шағымданған. Әлеуметтік желіде соған ұқсас тағы бір видео тарады. Бейнежазбаны жариялаған бойжеткеннің айтуынша ол Toyota FJ Cruiser-мен келе жатқанда жаяу жүргіншілер көпірінен біреулер тас лақтырған.
Демек бұзақылар жолда кем дегенде екі машинаны зақымдады.
Полиция департаменті көліктерге көпірден тас атқан балаларды тапқанын хабарлады. Қолда бар мәліметке сенсек, олар Медеу ауданында тұратын 2011 және 2012 жылы туған жасөспірімдер екен. Олар мұны қызық үшін істегенін айтыпты. Полицейлер Қылмыстық кодекстің 202-бабы бойынша тергеу жүргізіп жатыр.
Бұл бап бойынша (бөтеннің мүлкін қасақана жою немесе бүлдiру) 2000 АЕК мөлшерінде айыппұл салу немесе сол мөлшерде түзеу жұмыстарына не 600 сағатқа дейін қоғамдық жұмыстарға тарту немесе екі жылға дейінгі мерзімге бас бостандығын шектеу не сол мерзімге бас бостандығынан айыру жазасы кесіледі.
Кәмелетке толмаған баланың заңсыз әрекеті үшін ата-анасы жауап береді.
Комментариев: 0