Шу — Қайнар тас жолының 50 шақырымын еңсеруге 2 сағат кетеді

Мемлекеттік сатып алу порталындағы мәліметке сәйкес билік Шу — Қайнар республикалық тас жолының 50 шақырымын жөндеуге үш жыл бұрын шамамен 19 млрд теңге бөлген. Тендерді «Теміржол құрылыс — Атырау» ЖШС ұтып алыпты. Жүргізушілер трассаның қазіргі жағдайын видеоға түсіріп, әлеуметтік желіде жариялады.

View this post on Instagram

A post shared by EGOV.PRESS (@egovpress)

«Шу — Қордай. Республикалық трасса дейді. Жолы осындай. Биыл үшінші жыл. Бұйырса жөндейтін шығар деген үміттеміз. 2030-ға дейін жөндейтін шығар. 50 километрді 2-3 сағат жүріп барасың. Негізі жарты сағаттық жол ғой. Сабыр берсін деп сабырмен кетіп бара жатырмыз. Жол осындай „керемет“ болып тұр!» — дейді видео авторы.

Видеоматериалда ауа температурасы күрт көтерілгеннен кейін жарты күн ішінде өзгерген жол төсемінің жағдайы көрсетілген. Осы кезде қар мен мұз еріп, жолдың төменгі қабаты жұмсарып, асфальт-бетон жоқ жерде шұңқырлар пайда болған. Мұны Kolesa.kz редакциясына Көлік министрлігінің Автомобиль жолдары комитеті түсіндірді. Шенеуніктердің айтуынша ұзындығы 56 шақырым болатын Шу — Қайнар трассасын жөндеу жұмыстары шынымен 2022 жылы басталған, бірақ бірқатар себепке байланысты тоқтап қалды.

«Жүйелі қаржыландыру болмағандықтан жоба ұзақ уақыт бойы шектеулі режимде істеп келді, бұл құрылыс-монтаж жұмыстарын толық көлемде атқаруға мүмкіндік бермеді. Жоба басталғалы бері мердігер екі рет ауысты, себебі олар келісімшарт міндеттемелерін тиісті деңгейде орындамады. Бұл істің мерзімі мен қарқынына әсер етті», — деді жауаптылар.

Қазір Жамбыл облысы Шу ауданындағы қолайсыз ауа райына (температураның төмендеуі, артынан көтерілуі, жауын-шашын және жол төсемінің шамадан тыс ылғалдануы) байланысты трассадағы жұмыстар уақытша тоқтады. Бұл уақытша өтпе жолдар мен айналып өтетін бөліктердің жағдайына әсер еткен. Қазір екі мердігер ұйым шұңқыр жамап, жолды автогрейдермен тегістеп, тазалап және көктайғаққа қарсы материал сеуіп жатыр.

Уақытша айналма жолдар шамадан тыс ылғалданып, көтергіш қабілетін жоғалтқандықтан жабық. Машиналар елді мекен ішімен өтеді. Транзиттік көліктер 1-категориядағы жолға (Шу — Қайнар трассасынан төрт есе ұзын. — Kolesa.kz редакциясының ескерт.) кіретін Қайнар — Меркі — Шу бағытымен жүреді.

Жоспар бойынша құрылыс 2027 жылдың аяғына дейін толық бітуге тиіс. Биыл асфальт-бетон төсемі жоқ, мамандар жағдайы нашар бөліктерді жөндейді.