23 қаңтарда шетелдік көлік мінген тұрғындар ұзақ күткен заңдастыру процесі басталды. Алғашқы күні-ақ шенділер 2 мыңнан аса өтінішті мақұлдады, ал 26 қаңтардағы мәлімет бойынша олардың саны 20 мыңға жуықтап (19 917) қалған. Дегенмен 1990 автомобиль ғана техпаспорт пен нөмір алды.
Заңдастыру барлық жүргізуші үшін сәтті болмаған сияқты. Нақты статистика жоқ, бірақ желіде билік түрлі себеппен көлік заңдастырудан бас тартып жатқаны туралы мәлімет тарады. Кейбір өтінім қабылдаушылар тіпті көлігін елде тіркеуге не себепті рұқсат бермегенін және жүргізуші енді не істейтінін айтпайтын көрінеді.
Қателесіп тіркемеген жағдайлар да болып жатыр-мыс. Комментарий жазған кісілер көлігі елге былтыр 1 қыркүйекке дейін кіргенін, оған сақтандыру полисі дәлел болатынын жазыпты. Алайда құзырлы органдар мұны растамай, өтінім қабылдамаған.
Машинасын заңдастырам деп одан айырылып қалғандар да бар. Сондай жағдай Ақтөбеде болғанын КТК арнасы хабарлады. Тексеріс кезінде машина Ресейде ұрланған көліктер тізімінде тұрғаны анықталған. Енді автомобиль айыптұрақта тұр. Иесі 4 млн теңгеге алған темір тұлпарын бір жылдан аса мініп жүргенін айтады, айыппұл да төлеген, бірақ шектеу туралы мәлімет бұған дейін еш жерде шықпапты.
Kolesa.kz редакциясы мәселенің анық-қанығына көз жеткізу үшін ақпарат жинап жатыр.
Комментариев: 0