ҚР ИИДМ автомобильді міндетті техникалық тексерістен өткізу қағидасына өзгеріс енгізбекші. Құжат жобасына сай аталған ереже тек Қазақстанда тіркелген автокөліктерге қатысты деген норманы алып тастау жоспарланған. Демек ел аумағында жүрген шетелдік нөмір таққан машиналар Қазақстанда техникалық тексерістен өтуі керек. Бұған дейін шетелдік машина техбайқау картасын алу үшін тіркеуде тұрған еліне баратын. Министрлік жаңа ереженің арқасында жолдағы қауіпсіздік жақсарады деп үміттеніп отыр.
Шенділердің бұл идеясы жаман емес. Өйткені ешкім ресейлік машинаны жылына бір рет Қазақстаннан алып шығып, тексерістен өткізіп жүрген жоқ. Адамдар түрлі жолмен Ресейден тексерістен өткені туралы анықтама сатып алып (көлікті тексертпей-ақ пошта арқылы), біздің елде жалғасты жүре береді. Қазақстан полициясы оның шын-жалғанын анықтай алмайды.
Енді шетелдік көлік иелері алысқа бармаса да болады. Ал полицейлер «бөтен» нөмір таққан машинаның техбайқау картасы бар-жоғын бірыңғай дерекқордан көре алады. Жоқ болса жазаға тартады (Әкімшілік кодекстің 590-бабы бойынша — 5 АЕК (15 315 теңге) айыппұл салады, бір жылда екінші рет ұсталса айыппұл 20 АЕК (61 260 теңге) болады).
Жаңа ереже жол қауіпсіздігін шынымен жақсарта ма, жоқ па, бірдеңе деу қиын. Елде техникалық тексерістің қалай өтетіні бәрімізге белгілі. Бұл саланы жемқорлық жайлағандықтан, оны алып тастау туралы бірнеше рет айтылды, тіпті депутаттар да осыны ұсынған. Бірақ шенділер бұл қажет шара екенін айтып, қолдамады. Олар саладағы заңсыз әрекеттерді жойып, ереже бұзғандарды жазалауға, қызмет сапасын жақсартуға уәде берген. Бірақ қазірше ештеңе өзгерген жоқ, жүргізушілер әлі де ауаға ақша төлеп жүр.
Қазақстанда міндетті техникалық тексерістен өту мерзімі:
1) Шыққан жылын қоса алғанда 7 жастан асқан, автотасымал саласындағы кәсіпкерлік қызметте қолданылмайтын M1 категориясы (жеңіл көлік), N1-3, O1-4, L1-7 (жүк көлігі, тіркеме және мотоцикл), қауіпті жүк тасымалдауға арналмаған арнайы және мамандандырылған көлік құралдары – бір жылда бір рет;
2) Автотасымал саласындағы кәсіпкерлік қызметте қолданылатын M1 категориясы (жеңіл көлік), М2, М3 (автобус), N (жүк көлігі), жолаушы таситын, сондай-ақ қауіпті жүк тасымалдауға арналған M1, N1-3, және O1-4 категориясындағы көлік құралдары 6 ай сайын тексерістен өтеді.
Комментариев: 0