«Сергек» жаяу жүргіншіге жол бермеген жүргізушіге айыппұл салады

Бүгін, 19 желтоқсаннан бастап камера жүргізуші мен алдыңғы жолаушы қауіпсіздік белдігін таққан-тақпағанын анықтайды. Сондай-ақ жүргізуші зебрада жаяу жүргіншіні өткізбесе, жаңа функция мұны анықтап, әкімшілік кодекстің 600-бабы бойынша айыппұл салады. Қауіпсіздік белбеуін тақпаған жүргізуші 593-баптың 2-бөлігі бойынша жауапқа тартылады. Бірақ жүргізушіге де, жолаушыға да айыппұл көлік иесіне келеді, өйткені Қазақстанда бет-әлпетті тану жүйесі әлі жоқ.

ІІМ хабарлағандай, егер автомобиль жаяу жүргіншіден кейін зебрадан өтсе, бұл жол ережесін бұзу болып саналмайды әрі камераға түспейді. Ал жүргізуші жаяу жүргіншіге жол бермесе, айыппұл арқалайды. Жаяу жүргінші мен автомобиль өткелде бірдей аумақта болса да (суреттегідей), ереже бұзу деп танылады.

Ішкі істер министрлігі биыл 11 айда Қазақстанда 556 жаяу жүргінші көлік қағып, қаза болғанын, оның 478-і жаяу жүргіншілер өткелінде болғанын айтты.

Жол ережесі бойынша жүргізуші мен жаяу жүргінші мынаны есте сақтауы керек:

• жүргізуші қауіпсіздік белдігін тағу керек әрі белдік тақпаған жолаушыны тасуға болмайды;
• жолда алдыңғы ғана емес, артқы орындағы жолаушы да қауіпсіздік белдігін тағуға міндетті;
• реттелмейтін жаяу жүргіншілер өткелінде жаяу жүргінші келе жатқан машинаның қашықтығы мен жылдамдығын ескере отырып, өткел қауіпсіз екеніне көз жеткізген соң ғана жолға шығуы қажет;
• оңға немесе солға бұрылғанда жүргізуші бұрылып жатқан бағытындағы жолды кесіп өтіп бара жатқан жаяу жүргіншіге жол береді;
• жаяу жүргіншіге жолға шыққан соң қауіпсіздік үшін болмаса, жол үстінде тоқтауға болмайды;
• жолдан өтіп үлгермеген жаяу жүргінші қарама-қарсы бағыттағы көлік легін бөлетін сызықта тоқтайды;
• әрі қарай қозғалу қауіпсіз екеніне көз жеткізген соң және бағдаршам сигналы (реттеуші) рұқсат берген соң ғана жолдан өтуді жалғастыруға болады.