Биыл наурызда автонарық жанданып, 10 753 көлік (2021 жылмен салыстырғанда 28.3 % жоғары) сатылған еді, сәуірде көрсеткіш қайта төмендеді. ҚАБА мәліметіне сүйенсек, бір айда жеңіл коммерциялық техниканы қоса есептегенде 9212 жаңа машина өткен. Бұл былтыр сәуірдегі көрсеткіштен 8.9 %-ға төмен. Ал төрт айда жалпы 31 582 көлік сатылып, 2021 жылмен салыстырғанда 8 %-ға төмендеді.
Сәуірде Chevrolet көліктері ең көп сатылды. Марка дилерлері 3004 машина өткізе алды, бұл наурыздағы көрсеткіштен 1.7 есе көп. Тұтынушылардың көбі Cobalt седанын таңдады. Модельдің 2111 данасы өткен. Одан бөлек 418 Nexia иесін тапты. Үздік маркалар рейтингінде Hyundai екінші (1802), Kia үшінші (968) орын алды.
2022 жылғы сәуір қорытындысы бойынша нарықтағы үздік 5 марка
| орын | Марка | 2022 жылғы сәуірдегі сатылым (дана) |
| 1 | Chevrolet | 3004 |
| 2 | Hyundai | 1802 |
| 3 | Kia | 968 |
| 4 | Toyota | 950 |
| 5 | Lada | 798 |
Танымал модельдер тізімінде Cobalt жеке көш бастады. Седанның 2111 данасы өтті, бұл екінші орындағы Hyundai Elantra-дан 4.5 есе көп. Сәуірде 468 Elantra сатылды. Үздік үштікке күтпеген жерден жаңа буындағы Kia Sorento (442) жайғасты. Төртінші сатыда Nexia (418) тұр. Наурызда үздік атанған Hyundai Sonata бестікті түйіндеді.
Үздік ондықтағы көрсеткішке қарасақ, Ресейде шығатын бюджеттік модельдер сатылымы төмендегенін байқаймыз. Мысалы, Lada Granta-ның 329 данасы ғана өтті (7-орын), наурызда модель екі есе көп сатылған. Hyundai Accent пен Kia Rio да осыған ұқсас. Жартылай өткізгіш тапшылығы, логистика мәселесі және Ресей-Украина қақтығысына байланысты өндіріс тұралап, автосалондар сұранысты орындай алмай отыр. Жаңа ақпарат бойынша АВТОВАЗ-дың Тольяттидегі бас зауыты мамырдың аяғына дейін көлік шығармайды.
Комментариев: 0