2020 жылдың 1 ақпанына дейін 14 мың қазақстандық Армениядан 22 мың машина әкелген. Оның ішінде 11 мың адам ғана бір көліктен алыпты. Қалғандары екі-үш көліктен сатып алса, кейбірі 10 машинаны атына жазған.
1 маусымнан машиналар уақытша тіркеле бастады, ҚР ІІМ қазіргі уақытта 6 мың көлік сары нөмір алғанын хабарлады. Бұл тізімде Атырау облысы көш бастап тұр, онда 1 200 машина уақытша тіркелді. Маңғыстау облысында мыңға жуық, Ақтөбе облысында 800, БҚО-да 400 машина сары нөмір алды. Министрлік ел азаматтары Армениядан алып келген көліктердің тек 1 қыркүйекке дейін уақытша есепке алынатынын атап өтті. Бұл шараның мерзімін ұзарту қарастырылмаған.
Сары нөмір алмаған армениялық көлік иелеріне 10 АЕК мөлшерінде айыппұл салынып, машина айып тұрағына жіберіледі. Олардың қалай анықталатыны және кейін не болары белгісіз. Өткен қыста ІІМ жоспарлы рейд жүргізбек болған, бірақ қоғамның қарсылығына тап болған тәртіп сақшылары райынан қайтып, уақытша тіркеумен шектелді. Белгіленген мерзім аяқталып келеді, 16 мың көлік иесі әлі сары нөмір алған жоқ. Көбі машинасын тіркей алмай отыр.
Мұның бірнеше себебі бар. Қайта жабдықталған көліктерге қатысты мәселе әлі шешімін таппады. Тіркеу ережесіне сай, рөлі ауыстырылған не газ баллон орнатылған көлік иелері мамандандырылған ХҚКО-ға көлік құралының қауіпсіздігін растайтын куәлік өткізуі тиіс. Бірақ аталған құжатты қазір алу мүмкін емес. Себебі ол үшін Арменияға жол тарту керек. Біраз уақыт бұрын ҚР ІІМ заңға енгізілетін, көлік құрылымының қауіпсіздігін елде тексеруге мүмкіндік беретін өзгерістер дайындап жатқанын хабарлады, бірақ бұйрық әлі жарияланған жоқ. Ол күшіне енген күнде де, аз уақыт қалғанын ескерсек, халықтың көлік рәсімдеп үлгермейтіні анық.
Армениялық темір тұлпарды Қазақстанда жүріп сенімхат/сақтандыру арқылы алғандарға қатысты да мәселе көп. Мұндай жолмен көлік тізгіндеген адамдарға машинаны өз атына уақытша тіркеуге рұқсат берілмейді. Ал тек сату үшін әкелгендер бар жауапкершілікті мойнына алуды қаламайды.
Комментариев: 0