Ең алдымен статистикадан аз-кем ақпарат: Армения ІІМ берген мәліметке сүйенсек, біздің отандастар бұл елден 22 мың автокөлік сатып алған. Оның 15 %-ы оң рөлді.
Қазақстанда 1 маусымнан бері армениялық көліктерді уақытша тіркей бастады. Бірақ ҚР үкіметінің тіркеу тәртібін бекітетін қаулысында Қазақстанға 2020 жылдың 1 ақпанына дейін жеткізілген рөлі сол жақта орналасқан көлік құралдары заңдастырылатыны анық жазылған. Сонда 15 % оң рөлді машина иелеріне не істеу керек?
Құжаттарда бұл сұрақтың нақты жауабы жоқ. Көлік құралдарын тіркеу ережелерінде VIN-коды 17 таңбадан аз машиналарды уақытша есепке қойғанда басқа құжаттармен бірге көлік құралының конструкциясына енгізілген өзгерістердің 018/2011 КО ТР 17 қосымшасындағы қауіпсіздік талаптарына сәйкестігі туралы куәлікті көрсету қажеттігі жазылған.
Өзге елден жеткізілген қайта жабдықталмаған машинаға оның қауіпсіздік талаптарына сәйкестігі туралы куәлік көлік тіркелген елде есептен шығарылған соң ғана беріледі және бұл іс біздің елде заңдастырылмай тұрып жүзеге асуы тиіс. Ал бізде зертханада қайта жабдықтауға сараптамалық талдау (рөлді ауыстыру ресми түрде осылай аталады) тек Қазақстанда тіркелген көліктерге ғана жасалады.
Осылайша, көлік құралының конструкциясына енгізілген өзгерістердің қауіпсіздік талаптарына сәйкестігі туралы куәлікті тек Армениядан алуға болады. Яғни, мұндай көлік иелеріне одақтас елге барып, машина рөлін ауыстырып, жергілікті зертханада тиісті сараптама жасатып, қауіпсіздікті растайтын куәлікті алған соң ғана елге оралып, машинаны уақытша тіркеу қажет.
Комментариев: 0