Салон сатқан көлікті қалай оңай тіркеуге болады

Цифрлық даму, инновациялар және аэроғарыш өнеркәсібі министрлігі салоннан алған көлікті алғаш тіркеу процесін толығымен онлайн форматқа ауыстыруға мүмкіндік беретін ереже жобасын 18 тамызда жариялаған.

Ведомство өкілдері Informburo.kz-тің сауалына жауап ретінде қазір сатып алушылар жаңа көлігін тіркеу үшін арнайы ХҚКО-ға барып, кезек күтуге мәжбүр. Оған қоса құжатының түпнұсқасын апаруға тиіс, ал онлайн рәсімдеген кезде қажет құжат та, мәлімет те деректер базасында тұрады деді.

Жоба бойынша сатып алушы мен сатушы электрондық цифрлық қолтаңба көмегімен сатып алу-сату келісімшартын онлайн жасайды. Содан соң сатушы (автосалон) eGov.kz порталында көлікті тіркеу туралы өтініш береді. Екі тарап қол қойған келісімшартқа қатысты мәліметті тиісті сервистен алады.

Келесі кезеңде сатып алушы дайын құжат пен нөмірді беретін арнайы орталықты таңдап, төленбеген айыппұл бар-жоғын тексереді, ондай ештеңе болмаса, техниканы есепке қойғанда және нөмір алғанда сұралатын алымды төлеп, өтінімге қол қояды. Айыппұл болса, алдымен қарызын өтеп, содан соң ғана автосалонның өтінімі сақталған бетке қайта өту керек.

«Полиция департаментіне қарасты процессинг орталығы өтінімді қарап, заң талаптары сақталғанына көз жеткізгеннен кейін көлікті тіркейді. Сатып алушы өзі таңдаған ХҚКО-дан дайын құжаттары мен нөмірін алады», — деді шенділер.

Жобаның мазмұнымен танысқан соң министрлік eGov.kz-те бұрын болған «Қазақстан Республикасының аумағында ресми дилерлерден сатып алынған көлік құралдарын бастапқы тіркеу» деген сервисті көшіріп алған-ау деп пайымдауға болады.

Бұл қызметті әкімшілік полиция комитеті бұғаттап тастаған. Енді оны пилоттық жоба ретінде іске қосайын деп отырған сияқты.