Рестайлингтен кейін Zeekr 001-дің қуаты артты

Geely концерніне қарасты Zeekr маркасы 001 электрокарының жаңарған нұсқасын нарыққа шығарады. Қытайдағы БАҚ таратқан ақпаратқа сүйенсек, модельге қатысты негізгі мәліметті әдеттегідей жергілікті өнеркәсіп министрлігі жария еткен. Бұл жолы модельдің күші де, жүріс қоры да ұлғайып, бағасы түсетін көрінеді.

Zeekr 001 рестайлингтен кейін артқы жетекті бір моторлы нұсқасын сақтайды. Бірақ мамандар 272 ат күшін беретін қозғалтқыштың орнын 421 “арғымағы” бар мотор басады.

Моножетекті 001 фирма желтоқсанда таныстырған Golden Brick батареясымен жабдықталады. Литий-темір-фосфатты аккумулятор қазіргі түрінен арзан болуы керек. Одан бөлек энергияны жақсы сақтап, тез қуатталады екен. Соның арқасында темір тұлпардың бағасы түсіп, алысқа шабатын болады.

Стандарт модельдің үздік түрленімі артқы осьтегі қозғалтқыш қоса 367 ат күшіне ие алдыңғы мотор алады. Нәтижесінде толық жетекті лифтбектің агрегаты жалпы 788 күш береді.

Zeekr 001-дің сырт пішіні де назардан тыс қалмады. Алдыңғы бамперінің ауа тартқышы жақсарып, дөңгелек дискісінің дизайны өзгерген. Сертификат суреттерінен жасыл түске боялған электрокарды байқауға болады. Жергілікті БАҚ модельдің салоны да аздап өзгереді деп жазды, бірақ ол туралы анық ақпар жоқ.

Қызығы, стандарт 001-дің дизайны да, сипаттамасы да су жаңа 001 FR-ге ұқсайды, бұл суперкар 1265 ат күшіне ие. Флагман мен бес есікті стандарт модельдің арасын жақындату олардың саудасына қалай әсер ететінін нарық көрсетеді. Марка жаңарған машинаны қашан сата бастайтыны әзірше белгісіз.